ليه تخاف من تطورات الذكاء الاصطناعي والتغير الي هيحصل
الحقيقه دايما اننا كــ بشر بنسعي للتطور في كل حاجه حتي من ضمنها انشاء كيان او اداه تكون خادمه لينا
زي الذكاء الاصطناعي لما نيجي نبص علي تطوراته السنين الي فاتت بعد كورونا
هنلاقي انه المعامل سرعت جدا من وتيره تدريبه لدرجه انه بقي في شركات بتستخدم الذكاء الاصطناعي بشكل يومي في شغل كل فرد فيها سواء في التسويق او في التصميم او في البرمجه او في المحاماه او في البحث والريسيرش وحاجات تانيه كتيره!
البشر دورهم مش مبني بس علي الادوار الحاليه الي موجوده في السوق لانه لو رجعنا لـ شويه وره قبل ثوره الكمبيوتر والانترنت الوظايف الجديده دي الي الواحد بيشتغلها من علي النت من بيته ل حد في بلد تاني او لشركه في مكان تاني مكنتش موجوده اصلا لكن بعد الثوره التكنلوجيه الي حصلت من الكمبيوتر والانترنت فتحت اسواق جديده وده ساعد بشكل كبير في الاقتصاد العالمي!
النظام الجديد الي هيحصل في العالم بعد تطورات الذكاء الاصطناعي الاخيره والي هيوصلها بحسب توقعات كل الشركات والمعامل المسؤوله عن الذكاء الاصطناعي بتعني انه في نظام اقتصادي عالمي جديد لازم ينوجد مش في بلد معينه انما في كل مكان عشان الوظايف الحاليه الي تم خلقها من الثوره الي فات عليها عشرات السنين قريب هتضمحل وهنحتاج انه نشوف التوجهه العام بعد كده هيكون عامل ازاي!
مثلا بشكل بسيط في الاستوديو عندي في شركات بتجيلي بتكون عامله مشاريعها بالذكاء الاصطناعي وبتبقي عايزاننا احنا نراجعها ونحسن منها لانه لسه موصلش للمرحله الي مش محتاج مراجعه انسانيه! ف هنا مثلا نقدر نقول انه من التوجهات الجديده او الوظايف الجديده انه نراجع مشاريع الشركات الي اتعملت بالذكاء الاصطناعي عشان نحسن منها او نطور منها او نمحي الاخطاء الي اتعملت منه!
كمان برضه نراجع المقالات والمحتوي والتصميم والافكار او حتي انه نعلم الكيانات الحكوميه او البنوك او الشركات الخاصه او العامه في استخدام الذكاء الاصطناعي وتحسين انتاجيه موظفيهم لانه الحاجه الي كانت بتاخد من وقتنا في ايهاب ستوديو ك شركه اسبوع بقينا بنعملها حرفيا في يوم حتي لو العميل جاي بس بفكره وميزانيه لكن معندهوش تخطيط واضح او افكار ممنهجه نقدر نعملها بنفسنا لانه الادوات والذكاء الاصطناعي الموجود في يومنا هذا بيساعدنا كـ بشر في التفوق علي حدودنا الانسانيه ومهاره التعلم الي بتاخد وقت كبير من عندنا!
الاسواق حاليا في حاله غير مستقره عشان كده مش هتلاقي وظايف كتيره الشركات بتفكر في مصلحتها الشخصيه وبتفكر الف مره لو محتاجين انسان او محتاجين ذكاء اصطناعي ونديه لحد من الموظفين يقوم بالوظيفه التانيه حتي لو مش هتكون ١٠٠٪ انما التوفير كبير ومع تقدم الذكاء الاصطناعي الموظف ده هيطلع نتايج رهيبه اكتر من شخص مش بيستخدمه!
انا مش بخوفك ومش بحاول اوترك بس انا بنصحك تماما انه العالم حاليا مش مستقر سواء في الوظايف او في التطورات الي بتحصل بشكل يومي لكن دوري هنا انه اشارك معاك بكل صراحه وامانه الي بشوفه والي بشتغل بيه في امريكا واسواقها او حتي اوروبا!
طبعا ممكن في شركات هتظل تفضل تستخدم البشر في وظايفها لكن النسبه مش هتكون كبيره اوي او ممكن يكون في قوانين صارمه من الحكومات في انه الذكاء الاصطناعي يكون عامل ثانوي او خادم للموظفين عشان الاقتصاد العالمي مش ينهار عشان لو ده حصل هتكون في حاله ركود مؤقتا لكن فظيعه ومؤلمه جدا للدول الي مش مستعده وللناس الي هتفقد وظيفتها وهتحتاج انها تدور علي مهارات جديده للتعلم (بلاش تستني لحد ما حاجه تحصل عشان تطور من نفسك ودايما تكون ف القمه ابدء من دلوقت عشان لو اي حاجه حصلت انتا متقدم باكتر من خطوه وهتعرف تتحرك اسرع من غيرك)
العالم بيتغير وبيتعاد تشكيله من جديد واحنا مش في البدايه لانه المعامل والشركات دي بدآت من سنين فاته لكن دلوقت بس بقي في ضخ واستثمارات رهيبه من شركات وحكومات في الذكاء الاصطناعي عشان يتم تسريع تطويره جداا لكن احنا بعاد تماما عن تطوير الذكاء الاصطناعي عشان نخليه يكون زي الانسان لان ده محتاج مليارات المليارات وسنين كتيره للتدريب لكن البشر مازال عندهم الجشع في انهم يوصله للحاجه دي عشان شايفين انه لازم نعمل الحاجه دي عشان نتحكم فيها عشان مش يتم تدميرنا بعدين (تفكير متكبر شويه بس بيآثر اوي علي ناس كتيره عاديه زيي انا وزي غيري)
في الاخر هختم لحظات التفكير دي بـ العالم الجديد اتعادت هيكلته من وقت كورونا وبدء الوظايف تكون متاحه من البيت وبقي البشر عندهم فرص انهم يشتغله من اي مكان ف العالم لـ اي مكان لكن دلوقت العالم بيعيد تشكيله تاني فــ انه الذكاء الاصطناعي استحواذه علي بعض الوظايف او تآثيره عليها بقي وتيره تقدمه اسرع من زمان باضعاف الاضعاف لدرجه انه شركات بتعلن تحديثات بشكل اسبوعي دلوقت مش زمان كل كام شهر
خليك جزء من العالم الجديد لانه احنا مجبرين علي التطور وده شيء حتمي
